Assalamualaikum !!!! Abang/Mpok, Nyak/Babè. Buat ngelestariin basè Betawi salah satunyè kitè mesti ngidupin lagi katè, ungkapan, dan peribasè Betawi nyang udè jarang kitè denger. Insya Allah ayè coba tampilin katè, ungkapan, dan peribasè Betawi nyang menurut ayè udè jarang kitè denger. Secara bersèri seminggu duè kali, tiap ari Rebo ame ari Minggu. Nyo’ Abang/Empo kitè ramein forum ini degan carè sampein ke mari katè, ungkapan, dan peribasè Betawi nyang Abang/Empok tau udè jarang dipake . Semoga adè gunènyè.
Salam dari ayè, bang Tadjuddin.
Sèri nyang keempat
Nomer | Katè | Artinyè | Dipakè dalem kalimat |
1 | bahnè | sebab; karena | Bahnè takutnyè, diè nggè berani ngeliat guè. |
2 | bebangkis | Sedang bersin | Sopannyè kalo lagi bebangkis, tutup mulut amè tangan. |
3 | bangkotan | (sudah) besar; tua | Lu udè bangkotan, jangan belagu kayè anak kecil. |
4 | bangor | nakal;suka usil | Kalo inget waya kitè kecil, masih bangor-bangornyè, jadi sukè ketawè. |
5 | dibanjur | disiram; diguyur | Baju guè dibanjur amè tu orang pakè aèr combèran. |
6 | baturan | tanah tempat berdirinya rumah | Di sini nih baturan rumah engkong-engkong kita dulu. |
7 | beberèkan | Berteriak-teriak memanggil | Ayè beberèkan dari setadian nggè adè nyang denger. |
8 | bedagel | kotor dan berdaki | Mandi sonoh Tong, tuh kaki udah bedagel. |
9 | bejaban | perkelahian satu lawan satu | Anak sekarang beraninyè keroyokan, nggè adè nyang berani bejaban. |
10 | belèpètan | dikotori dengan | Tuh celanè udè padè belèpètan oli. |
Sumber: Kamus Dialek Jakarta, Abdul Chaer